BAGUIO CITY – Manamnama a maipatungpal ti turnover cemerony ti Jose Mencio farm-to-market road (FMR) sadiay Atok, Benguet inton Oktubre 29.
Naipatungpal ti proyekto iti sidong ti Philippine Rural Development Project (PRDP) ti Department of Agriculture (DA).
Sigun iti ahensia, naponduan ti proyekto iti nasurok P202 million manipud iti World Bank ken addaan daytoy iti counterpart manipud iti DA ken iti lokal a gobierno ti Benguet.
Kinuna ni DA-CAR Regional Executive Director Cameron P. Odsey a panawenen tapno maipaima kadagiti residente ti nasao a proyekto.
Sakup ti farm to market road ti innem a barangay ti Atok a pakairamanan ti Abiang, Caliking, Topdac, Poblacion, Naguey ken Pasdong.
Manamnama a dumur-as iti 20 a porsiento ti produksion iti kape dagiti residente sadiay Atok apaman a maaramat ti nasao a farm-to-market road.
