BAGUIO CITY – Nagpalawag ni Reverend Father Denard Castillo, missionary priest ti religious group a Filipino Katoliko, Inc. maipapan iti panagsolicitda ti financial support wenno voluntary donation manipud kadagiti residente, business establishments ken opisina iti siyudad ti Baguio.
Sigun kenni Castillo, adda ti sangapulo ket maysa a kadwana a missionary manipud Davao de Oro nga immay iti siyudad ti Baguio para iti panggepda a panagkiddaw ti boluntaryo a tulong para iti pannakaibangon ti simbaanda idiay Compostila valley sadiay Davao de Oro kas paset ti pannakaipakaamoda iti simbaanda.
Impetteng ni Reverend Father Castillo a nakikoordinar ken nagdawatda ti sertipikasyon kadagiti opisyales iti lugarda sakbayda a nagturong kadagiti nagduduma a lugar iti pagilian para iti fund raising dagitoy wenno ti aw-awaganda a “sacrificial dates” para iti pannakaipatakder ti simbaan dagitoy.
Innayonna a sakbay a nagrikus dagitoy iti siyudad ti Baguio ket nagpakadada pay iti opisina ni Mayor Benjamin Magalong, opisina ti Baguio City Police Office ken dadduma pay nga ahensiya ti gobyerno.
Impeksa pay ni Rev. Fr. Castillo nga adda ti imetda a dokumento a pinirmaan dagiti nagduduma nga opisyales ken otoridad kas pammaneknek a legal ken nasayaat ti intensyon dagitoy a mangipatungpal iti nasao nga aktibidad.
Kabayatanna, inaklon ni Rev. Fr. Castillo a saanda a konekto iti Roman Catholic ngem maysa metlaeng dagitoy a religious group ken independent Catholic iti pagilian a nakarehistro iti Securities and Exchange Commission idi pay tawen 1995.
Inaklonna pay a makaaw-awatda ti negatibo a komento manipud kadagiti tattao gapu kadagiti nagwaras a post iti social media pakairamanan ti Diocese of Baguio a mangibagbaga a ti Filipino Katoliko, Inc. ket saan a konektado iti Roman Catholic.
Nupay kasta, inlawlawag ni Rev. Fr. Castillo nga awan ti negatibo wenno dakkes a panggep ti Diocese of Baguio ken dadduma pay a simbaan iti impablaakda a post iti social media gapu ta kayatda laeng nga ipakaammo a ti Roman Catholic ken Filipino Katoliko, Inc. ket nagduma.
Inyunay-unayna a saan nga inkapilitan ti panangipaay ti donasyon gapu ta raemenda ti desisyon ken pammati ti tunggal indibidual.//Bombo Marielle-mp4
