BAGUIO CITY – Biniag manen ti lokal a gobyerno ti Itogon, Benguet dagiti force multipliers ti munisipyo tapnu tumulong dagitoy iti maipatpatungpala a checkpoint kagiddan ti manarimaan nga Enhanced Community Quarantine gapu iti COVID-19.
Iti panakiyuman ti Bombo Radyo Baguio, kinuna ni Mayor Victorio Palangdan a daytoy ket gaputa adu ti entry ken exit points sadiay.
Innayonna a dagus met a nagaramidda iti schedule para iti panagturong ti tallo a lugan ti munisipyo kadagiti babbarangay ti Itogon tapnu pagluganan dagiti tattao nga addaan napateg nga aramiden iti siudad ti Baguio.
Sigun pay kenkuana, katinnulong dagiti lugan ti munisipyo ti lugan ti barangay ken dagiti jeep a mapalubusan nga agbiahe malaksid pay kadagiti pribado a lugan.
Kagiddan iti daytoy, inyapela manen ni Mayor Palangdan kadagiti umili ti panagtulnog dagitoy kadagiti pagalagadan ken paglintegan a maipatpatungpal tapnu masalwadan ti tunggal umili manipud iti COVID-19.
