BAGUIO CITY – Maikalkalikagum ita ti panagala iti clearance dagiti gangannaet a turista a kayatda ti sumarungkar iti nalatak ken prestihioso a Philippine Military Academy (PMA) ditoy siudad ti Baguio.
Nailanad iti public advisory ti PMA a nasken nga agala dagiti foreign tourists iti nasao a clearance, dua a lawas sakbay ti panagsarungkarda iti akademya ken iparangda ti surat a nakailanadan ti panggep, aldaw ken oras ti panagbisita, kopya ti pasaporte, pakairamanan ti nagan dagiti kakadwada a Pilipino.
Inlawlawag ni PMA spokesperson Captain Cheryl Tindog a maitunos daytoy kadagiti polisiya, pagalagadan ken proseso nga ikalkalikagum ti Department of National Defense seknan iti panagsarungkat dagiti gangannaet kadagiti amin a military installations, offices, units ken areas of operations pakairamanan ti akademya.
Nabukel ti nasao a pagalagadan idi pay ’80s ken napabaruan laeng idi napalabas a bulan ti Enero.
Innayonna a ti nasao a pagaladagan ket standard operating procedure a nasken a suruten dagiti amin nga unit ken kampo ti Armed Forces of the Philippines, pakairamanan ti PMA.
Nupay kasta, linawlawaganna a silulukat ti PMA kadagiti amin a Pilipino a kayatda ti sumarungkar sadiay iti innaldaw manipud alas-otso ti agsapa agingga alas-singko ti malem.
Dinakamatna a mabalin a mairikep ti PMA iti publiko no adda dagiti command activities ken dadduma nga aktibidad a mangikalikagum iti panaka-aramat ti akademya.
