Nasentensiaan ni ACT Teachers party-list Representative France Castro ken sigud a Bayan Muna party-list representative Satur Ocampo iti korte idiay Tagum, Davao del Norte iti agingga iti innem a tawen a pannakaibalud gapu iti panangipeggadda kadagiti menor de edad idi Nobiembre 2018.
Iti limapulo ket lima a panid, naduktalan ti Tagum Regional Trial Court Branch 2 a ni Ocampo ken sangapulo ken maysa a dadduma pay ket “guilty” wenno nagbasol iti panaglabsing ti Section 10 iti Republic Act 7610 wenno Special Protection of Children Against Abuse, Exploitation, and Discrimination Act ken maibalud dagitoy iti uppat agingga innem a tawen.
Imbilin pay ti korte nga agbayad dagitoy ti P10,000 kas civil indemnity ken P10,000 kas moral damages iti tunggal menor de edad nga addaan ti interets a 6% per annum.
Kabayatanna, inabsuelto ti korte da Pastor Edgar Ugal, Rev. Ryan Magpayo, Eller Ordeniza, ken Rev. Jurie Jaime gapu iti pannakapaay ti prosekusion a mangpaneknek iti basol dagitoy.
“Records reveal that the prosecution has established proof beyond reasonable doubt that [the] accused… committed acts detrimental to the safety and well-being of the minor Lumad learners.”
Nagramut ti nasao a pangiddeng manipod iti “trafficking” a naipila kontra kadakuada ken 17 a dadduma pay gapu iti maatap panangiggemda kadagiti menor de edad kabayatan ti solidarity mission dagitoy sadiay Talaingod, Davao Del Norte idi Nobiembre 2018.
