Kidkidawen ti Bagong Henerasyon party-list ti pannakasukimat dagiti pagalagadan ti Philippine Health Insurance Corporation’s (PhilHealth) kalpasan ti report a saanda a naasistaran ti 25-anyos a pimmusay iti ospital.
Sigun kenni BH party-list founder ken spokesperson Bernadette Herrera, saan nga isolated ti kaso ni Maria Lourdes Sulit a pimmusay ti asawanna kalpasan a saanda a kabaelan a bayadan ti life-saving treatment.
Maibasar iti report, naiturong iti Manila Doctors Hospital ti asawa ni Maria Lourdes a ni Marvin kalpasan a nakapasar iti brain hematoma idi June 04, 2026.
Napakaammuan ti pamilya daytoy a dumanon iti P4 millin ti bayadanda iti emergency surgery.
Nabalakadan metlaeng dagitoy nga umakarda iti ospital no saanda a kabaelan a bayadan ti nasao a gatad.
Nupay kasta, pimmusay metlaeng ni Marvin ken dumanon iti P200,000 ti hospital bill dagitoy.
Sigun kenni Herra, saan a kualipikado ni Marvin iti case rate system ti Philhealth agsipudta saan a nagbayag iti 24 nga oras ti pannaka-ospital daytoy.
Impetteng ni Herra nga “injustice” ti napasamak iti pamilya Sulit nangruna ket nagbaybayad ni Marvin iti kontribusyonna iti PhilHealth bayat ti panagtrabaho daytoy.
Kamaudiananna, naakawat metlaeng ti pamilya Sulit iti tulong manipud iti PhilHealth babaen iti tulong ti Vice President ti nasao nga state insurer a ni Bernadette Lico.
Impaganetget ni Herrera a masapul nga adda ti maaramid tapno matarimaan dagiti policy gaps iti PhilHealth agsipudta sigun kenkuana, mapaspasamak daytoy nga insidente kadagiti adu a Pilipino.
