Nagbalinen a maysa a linteg ti singasing a gakat para iti libre nga entrance examination kadagiti nakwalipikar nga estudyante iti private higher educational institutions (HEIs) kalpasan a nag–“lapse into law” daytoy.
Patienni House Speaker Ferdinand Martin Romualdez a dakkel a tulong daytoy para kadagiti estudyante partikular iti financial a pagkasapulan.
Ti Republic Act No. 12006 wenno ‘Free College Entrance Examination Act’ ket insingasing ni Senador Ramon “Bong” Revilla Jr. no sadino panggep daytoy a mangipaay iti dekalidad nga edukasyon iti kolihiyo partikular dagiti marigrigat ngem nalalaing nga estudyante tapno saan dagitoyen nga agbayad iti entrance examination fees ken charges para iti college admission.
Iti nasao a linteg, amin a private higher educational institutions (HEIs) ket saandan nga agsingir iti nasao a fees ken charges kadagiti estudyante nga ag-aplikar para iti college admission la ketdhi nakwalipikar dagitoy.
Para kadagiti nakwalipikar nga estudyante, kasapulan a natural-born Filipino citizen; manipud iti top 10% a graduating class; manipud kadagiti marigrigat a pamilya; kasapulan nga agaplikar iti college entrance examination kadagiti pampribado a pagadalan; ken kasapulan a kompleto dagiti kasapulan a dokumento.//Rose
