BAGUIO CITY- Temporaryo a nasuspendir ti panakaiwaras ti fuel subsidy dagiti Public Utility Jeepney drivers ken operators iti Cordillera.
Sigun kenni Land Transportation and Franchising Regulatory Board (LTFRB) Cordillera Regional Director Engr. Lalaine Sobremonte, temporaryo a sinuspindir ti LandBank iti pannakaiwaras dagiti cards ken crediting gapu iti agdama nga Election Spending Ban.
Kinunana nga urayenda pay ti pammalubos wenno desisyon ti Commision on Elections (COMELEC) iti pannakailaksid dagitoy iti nasao nga election ban.
Iti kaudian a datos ti LTFRB CAR, dumanon paylaeng iti 300 manipod iti rinibribo a benipisyaryo dagiti nakaawat iti nasao a subsidiya.
Maipalagip a makaawat iti 6,500 dagiti benipisyaryo iti umuna a tranche ti Phase 3 ti Oil Subsidy a pakairamanan dagiti drivers iti taxi, jeepney, UV Express, bus ken tourists bus
Malaksid iti dayta, kanayunan pay a 6,500 ti maawatda iti maikadwa a tranche ti Phase 3 ti nasao a subsidiya.
Mainaig iti dayta, ikagkagumaan metten ti Commission on Elections (COMELEC) Cordillera a mangisakad iti pannakailaksid ti pannakaiwaras ti Fuel Subsidy kadagiti drivers ken operators iti rehiyon iti implementasyon ti Election Spending Ban
