Naisubmitir iti House of Representatives ti gakat para iti pagsayaatan dagiti Senior Citizens iti pagilian a Pilipinas.
Maibasar iti House Bill No. 5187 nga indatag ni Senior Citizens Party-list Rep. Rodolfo Ordanes, makidkiddaw ti pannakaingato ti diskuento dagiti Senior Citizens bayat a lumaklakay ken bumakbaket dagitoy .
Nakalanad iti gakat a manayunan iit lima a porsiento ti 20-percent a diskuento dagiti senior citizen iti tunggal kanayonan nga edad daytoy.
Mangrugi daytoy iti kanito a makadtengda iti edad a 70.
Nailawlawag iti gakat a bayta a manaynayunan ti edad dagiti senior citizen, umadu- adu met ti paggastosanda iti agas, mobility assistance, inaldaw a panagbiagda ken dadduma pay.
Kabayatanna, naisingasing ti House Bill 5862, wenno ti proposed Public Nursing Home Act of 2025.
Iti nasao a gakat, makidkiddaw ti pannakaipasdek dagiti public nursing homes para kadagiti nataengan iti tunggal siudad ken munisipyo iti pagilian.
