Nangipila ni Senator Risa Hontiveros iti gakat a mangipaay iti karbengan iti presidente a mangipatungpal iti price cap iti singir ti kuryente iti kanito a maaddaan iti state of emergency wenno kalamidad iti pagilian tapno maprotektaran dagiti konsyumer kontra iti killaat a panagngato ti electricity rates.
Iti sidung ti Senate Bill No. 2361, panggepna nga amyendaran ti Electric Power Industry Reform Act wenno EPIRA no sadino mabalin a mangipatungpal ti presidente iti mandatory price ceiling iti presyo ti kuryente.
Sigun kenni Senator Hontiveros, rumbeng a saan a maawanan ti kontrol ti panangngato ti singir ti kuryente iti pagilian nangnangruna ta agtultuloy a mapaspasaran dagiti Pilipino ti epekto ti panagngato ti presyo dagiti makan, transportasyon, agas, ken dadduma pay a kangrunaa a gagatangen.
Malaksid iti price cap, nailanada metlaeng iti nasao a gakat ti 90 nga aldaw a moratorium iti panangputed iti suplay ti kuryente ken panangipaay iti deferred payment schemes kadagiti residential consumers ken micro, small and medium enterprises (MSMEs) iti panawen ti emerhensya.
Karaman metlaeng iti nasao a gakat ti panangbukel iti Consumer Advocacy Office iti sidung ti Department of Trade and Industry (DTI) tapno agserbi kas representative dagiti konsyumer nangnangruna nu maipapan iti power rates, franchise proceedings ken dadduma pay a polisiya. //bombokaren.c.sapirao