BAGUIO CITY -Nakemmeg ti tallo nga indibidual a pakairamanan ti maysa a ganganaet kalpasan a natiliwan dagitoy nga agiklaklako iti imported a napagango marijuana kadagiti otoridad a nagserbi buyer.
Naipatungapal ti buybust operation sadiay Purok 2, Gibraltar, Baguio City idi kalman.
Nabigbig met dagiti suspek a da Troy Adalim Mencio Jr., Daniel Paul Castro ken ti foreign national a ni Hamed Abraham.
Kabayatan ti operasion ti nagtipon a pwersa ti operatiba ken pulisya, nakumpiskar manipud kadagiti suspek ti 14.175 a gramo ti napagango a marijuana nga aggatad iti P20K.
Naala pay manipud kadakuada ti naaramat a buy bust ken boodle money a naaramat iti transaksion.
Naituding a mapilaan dagiti suspek iti kaso a panaglabsing iti Comprehensive Dangerous Drugs Act of 2002.
