BAGUIO CITY – Apektado dagiti bus companies ditoy lokalidad gapu kadagiti precautionary measures a maipatpatungpal kontra iti pangta ti COVID-19.
Sigun kadagiti personnel dagiti bus companies a masarakan sadiay Governor Pack Road ditoy siudad ti Baguio, normal latta ti 30 minutes interval iti biahe dagiti bus dagitoy paturong sadiay Metro Manila ken iti dadduma a probinsia iti Luzon.
Nupay kasta, parikut dagitoy ti bimmassit a bilang dagiti pasahero gaputa uray bassit ti linaon dagitoy ket kasapulan nga agrubwatdan a sumalog.
Dinakamatda a napintasen ti 20 a bilang dagiti pasahero a mailugan dagitoy iti maysa a biahe.
Iti met panagrikos ti Bombo Radyo News Team, adda dagiti nakita nga alcohol a naka-display kadagiti bus terminal sadiay Governor Pack Road para kadagiti pasahero.
Kabayatanna, inyetnag ni Abra Governor Joy Bernos ti pammilin a mangibagbaga nga amin a pasahero ti parapubliko ken pribado a transportasyon ket ag-fill up iti health declaration form a maisubmitir kadagiti entry point iti probinsia.
Mapalubosan laeng a sumrek sadiay Abra dagiti private ken public vehicle manipud alas kuatro ti parbangon agingga alas dose iti tengnga ti rabii (4:00am-12:00mn).
