BAGUIO CITY – Ibaklay ti lokal a gobierno ti probinsiya ti Benguet babaen iti Benguet General Hospital ti babayadan iti RT-PCR test dagiti vegetable drivers ken helpers.
Resulta daytoy ti naangay a taripnong ti probinsial a gobyerno ken dagiti stakeholders ti La Trinidad Vegetable Trading Post.
Napagnunumuan pay a mailaylayon iti maysa a lawas ti validity ti negatibo a resulta ti COVID-19 test dagiti drivers ken helpers dagitoy kadagiti border checkpoints manipud iti sigud a 72 nga oras.
Sigun kenni Governor Melchor Diclas, nabukel ti maysa a katulagan iti nagbaetan ti lokal a gobyerno ken asosasyon dagiti mannalon iti Benguet para iti panakaipatungpal ti nasao a banag tapno mapalag-anan dagiti indibidual a mangibi-biyahe iti nateng sadiay Metro Manila ken iti dadduma pay a lugar.
Kagiddan iti daytoy, dinakamat ni Governor Diclas nga ad-adalenda pay ti kiddaw dagiti vegetable truckers a panakailatang ti maysa nga aldaw a panakabakuna dagitoy.
Inkari ti opisyal a posible a maipatungpal daytoy no manayunan ti suplay ti bakuna a maipapaay iti probinsya .
Impanamnamana a karaman kadagiti maipangruna iti vaccination program ti gobierno ket dagiti agibi-biyahe iti nateng manipud kadagiti nagduduma a lugar.
