Naipaayan ni United States President Donald Trump iti standing ovation apaman a simmangbay iti Israeli parliament kasaruno ti panakawaya-waya dagiti nakawtibo nga Israeli manipod iti ima dagiti militante a grupo nga Hamas.
Malaksid iti dayta, impaay met ni Egyptian President Abdel Fattah El-Sisi kenni Trump ti Collar of the Nile wenno Order of the Nile — ti kangatwan nga state honor idiay Egypt gapu iti nagbalin a kontribusyonna iti panakaitandudo iti kappia, panakarisut iti suppiat, ken ti naipaayana tapno magun-od ti ceasefire iti nagbaetan iti Israel ken Hamas.
Naipaay ti pammadayaw kabayatan ti peace summit a naangay idiay Egypt a pinasetan dagiti nasurok 30 a world leaders.
Iti panagbitla ni Trump, sipapannakkel a kinunana a nagleppasen ti gubat idiay Gaza iti baet nga umuna paylaeng a phase iti katulagan ti naipatungpal.
Gapu iti dayta, patienna a mangrugi itan ti rebuilding a para kenkuana ket kalakaan a paset iti nasao a problema.
Iti nasao a seremonya, pormal metten a napirmaan ti peace agreement wenno ti Gaza ceasefire agreement partikular ni Trump, Egyptian President Abdel Fattah El-Sisi, Turkish President Recep Tayyip Erdoğan, ken Qatari Emir Tamim bin Hamad Al Thani.
Maipalagip nga idi kalman, naragsak ken emosyonal dagiti pamilya ken gagayyem dagiti nakawtibo nga Israeli gapu ta kalpasan iti dua a tawen ket winaya-wayaan idan iti militante a grupo nga Hamas.
Kagiddan dayta, sinarabo dagiti adu a tattao dagiti balud a Palestinian a winaya-wayaan met iti Israel iti kapada nga aldaw a paset metlaeng iti ceasefire agreement iti nagbaetan iti Israel ken iti Hamas.
