BAGUIO CITY – Agtalinaed ti Baguio City iti estado daytoy a General Community Quarantine.
Inwaragawag daytoy ni Atty. Althea Alberto, Executive Assistant IV iti City Mayor’s Office iti panakiuman ti Bombo Radyo Baguio iti baet ti panagngato ti kaso ti siudad iti COVID-19 ken iti presensia ti Delta variant.
Sigun kenkuana, saan a daytoy ti umuna a gundaway a napasaran ti siudad ti panagngato ti kaso ti COVID-19 ken nabaelan ti siudad a naimaton ti nasao a sitwasyon.
Innayonna nga iti agdama ket kabaelan paylaeng ti Baguio nga imaton dagiti kaso ti COVID-19 gaputa adda ti buffer iti health care system.
Dinakamatna nga iti agdama ket dagiti mild agingga moderate cases ti kaaduan a kaso ti siudad ken awan pay dagiti severe cases.
Sigun kenkuana, posible a gapu daytoy iti manarimaan a panagbakuna kontra iti coronavirus.
