Natiliw ti 20-anyos a Grade 11 student kalpasan a maatap a pinapatayna ti maestrona idiay Lanao del Sur itay nabiit.
Sigun iti Lanao del Sur Police Provincial Office, naglemmeng ti suspek a ni “alias Kaizer” kadagiti kakabagyanna ngem napalabas ti innem nga aldaw ket insuko daytoy ti kabsatna a pulis kadagiti awtoridad.
Inaklon ti suspek nga inaramidna ti krimen gapu iti gurana iti maestrona a nangipaay kenkuana iti bagsak a grado.
Idi Agosto 4, pastrek ni teacher Danilo Barba, 34-anyos iti school campus idiay Narra, Balabagan, Lanao del Sur idi killaat a pinaltugan ni “alias Kaizer” usar ti caliber .45 pistol.
Babaen kadagiti mannursuro, bystanders ken tricycle drivers a nakakita iti krimen ket nabigbig ti suspek a nakamotorsiklo.
Naduktalan a saan laeng a ni teacher Barba ti nangipaay iti bagsak a grado iti suspek gapu ta uray natiliwen daytoy ket adda dagiti dadduma a mannursuro a nangipeksa iti panagbutengda para iti seguridadda agsipud ta impaayanda met ti suspek iti bagsak a grado.
Nupay kasta, kinuna ti suspek kadagiti awtoridad a ni laeng teacher Barba ti kagurana.
Napilaan metten ti suspek iti kaso a murder.
