Maysa nga estudiante a Grade 3 a ni Jonard ti Maria Cristina Falls Elementary School idiay Iligan City ti kritikal ti kasasaadna ken agdama nga agpatpataming iti pag-agasan kalpasan a binugbog ti lima a high school students.
Maibasar iti report, bayat a mangmangan ti pangaldaw ti ubing, kellaat isuna a dinandanog ti grupo dagiti high school students.
Iti panangi-estoria dagiti nakaimatang wenni “witness”, dinanog dagiti high school students ti ulo ti ubing a saan pay a nainaganan, gapuanan tapno ngumato ti gurigorna ken kumaro ti kondisionna.
Gapu iti nakaro a pannakadangranna, dagosda nga intaray ti ubing iti Northern Mindanao Medical Center idiay Cagayan de Oro City nu sadinno, adda ita iti Intensive Care Unit (ICU).
Ti pamilia ni Jonard ket agkidkiddaw ti hustisia ken tulong ti pinansial para iti inaldaw a gastosda bayat nga agpapaimbag ni Jonard iti ospital.
Immuna a kinondenar ni Iligan City Mayor Frederick Siao ti insidente ken inakarina a saanna a baybay-an ti kaso. Nakitinnulong met daytoy kadagiti otoridad ken iti Department of Education para iti imbestigasion ken ti panangbigbig kadagiti karaman nga estudiante.
Nangidanon metten ni Mayor Siao ti pinansial a tulong iti pamilia ti biktima para iti gastoda iti ospital.
Kidkiddawen ti nasao nga opisial a paingten dagiti pagadalan ken nagannak iti panagbantay kadagiti estudiante.
Mangnamnama ti lokal a gobierno a maipaayan ti hustisia ti ubing ken marisut dagiti pagtataudan ti kapada a napasamak.
