Imbestigaran ti Philippine National Police (PNP) ken Department of Education (DepEd) ti ipupusay ti Grade 4 nga estudiante kalpasan ti school deworming activity dagitoy.
Sigun kenni PNP spokesperson P/Col. Allan Rae Co, manarimaan ti koordinasyon ti PNP iti DepEd.
Nupay kasta, ilawlawagna a saanna a kayat a sawen nga adda ti aniaman a negligence wenno liability iti napasamak nga insidente.
Kabayatanna, binalakadan ti PNP Trece Martires Component City Police Station ti publiko a liklikan ti panagiwaras iti saan a beripikado nga impormasyon mainaig iti nasao nga insidente.
Sigun iti ahensiya ken ti DepEd, napateg nga urayen ti resulta ti imbestigasion ken eksaminasion sakbay a mangipaay iti konklusion.
Maipalagip a pimmusay ti Grade 4 a ni Rex manipud iti Hugo Perez Elementary School-Annex sadiay Trece Martires City, Cavite.
Maibasar iti death certificate daytoy, pimmusay iti septic shock gapu iti central nervous system infection.
Nupay kasta, suspetsa dagiti dadakkelna a na-overdose gapu iti deworming medicine.
