BAGUIO CITY – Nilawlawagan ti mayor iti Itogon ti sangsanguen daytoy nga isyu mainaig iti naipila kenkuana a kaso partikular iti graft and corruption case nga inpablaak ti maysa a publisher iti pagiwarnak.
Sigun iti mayor, awan iti naawatna a surat a naipila kenkuana mainaig iti nasao a banag manipud iti Ombudsman kas iti kinuna ti publisher.
Nupay kasta, imbinglayna a ti nasao a kaso daytoy ket mainaig iti Farm to Market Road project kasta metten iti COA reports seknan kadagiti ayuda a naibunong iti masakupanna.
Inlawlawagna a ti nasao a Farm to Market Road ket national government project nga iyem-implementar iti Department of Public Works and Highways (DPWH).
Inlawlawagna pay a ti COA reports ket nagkurang iti attachment a naisubmitarda mainaig iti nagan dagiti immawat iti ayuda ngem manarimaan itan iti panagpirma dagiti nagnumar iti daytoy.
Impettengna a naiwaras amin dagiti ayuda a naipaay nu sadino innaklonna a kurang iti pirma dagiti umili gaputa naibunong daytoy kadagiti designated dropping areas kabayatan iti nainget nga implementasyon iti anti-Covid-19 measures idi tawen 2020.
