Inwaragawag ni German Chancellor Olaf Scholz idi laeng kalman nga agtaltalinaed ti Group of Seven (G7) a matalek iti pagilian nga Ukraine.
Daytoy ket gapu iti panggepda a mangipaay ti kanayunan a pinansial a suporta para iti nasao a pagilian.
Bayat ti Group of Seven (G7) annual summit, kinuna ni Scholz kenni Russian President Vladimir Putin a “misguided” wenno naallilaw a mangnamnama a bumassit ti internasional a suporta iti Ukraine bayat ti panaglabas ti panawen.
Kinuna pay ti nasao nga opisial iti presidente ti Russia a saan a mabalin nga agtugaw laeng daytoy ken mangnamnama a dagiti parikut iti pagilian a mangsupsuporta iti Ukraine ket maysa nga aldaw a mangipalubos kenkuana nga agballigi iti gubat.
Mangnamnama pay daytoy a ti panagkumitda iti Ukraine ket mangpatured kadagiti umili sadiay nga agaramid ti wagas a mangidepensa ti panagwaywayas ken soberanya dagitoy.
Ti G7 ket bukbuklen ti Canada, France, Germany, Italy, Japan, United Kingdom ken ti United States.
