BAGUIO CITY – Rinugianen ti lokal a gobyerno ti Atok, Benguet ti kaskenan nga addang tapnu maideklara wenno agbalin a tourist attraction ti Guerilla Saddle a marasakan sadiay Kilometer 26 ti Barangay Caliking.
Sigun kenni Mayor Raymundo Sarac, nagsurat daytoy iti Regional Office ken iti Benguet Provincial Office ti Department of Tourism ken iti DPWH-Benguet 2nd Engineering District Office tapnu ipaka-ammo ti panggepda a panagbalin a viewdeck ti nasao a disso.
Dinakamatna a nakisinnarak daytoy kadagiti maseknan nga opisina itay laeng nabiit tapnu kitaen ken rukuden ti pakaipasdekan ti viewdeck.
Innayonna a panggepda pay a simpaen ti rangtay iti nasao a disso ken agaramidda iti comfort rooms para kadagiti agturong sadiay.
Maibasar iti pakasaritaan, ti Guerilla Saddle sadiay Atok ket ti disso a nakapasamakan ti gubat iti nagbaetan dagiti Cordilleran guerilla fighters ti USAFIP-NL 66th Infantry Regiments ken dagiti Japanese Imperial Forces kabayatan ti Maikadua a Gubat Sangalubongan.
