BAGUIO CITY – Pimmusay ti pangrabii a gwardiya ti Baguio Market Vendor’s Association Cooperative kalpasan a pinapatay daytoy dagiti saan pay a nabigbig iti uneg a mismo ti nasao a kooperatiba idi rabii.
Nabigbig daytoy a ni Robert Oficiar, 27 anyos, awanan ti asawa, agarup lima a tawen nga agserserbi a gwardiya ti nasao a kooperatiba ken residente ti T. Alonzo Street, Baguio City.
Sigun kenni P/Supt. Rodrigo Leal, medico-legal chief ti PNP-SOCO Baguio, kas maibasar iti inisyal nga eksaminasyonna ket nagsagrap ti biktima iti stab wounds wenno saksak iti kanigid a barukong ken iti nagbaetan ti dua a mata daytoy, sumagmamano a hack wounds iti ulo ken ligature mark iti tengnged daytoy.
Innayonna nga adda pay ti sumagmamano a defense wound iti dua a takiag ti biktima a mangipakpakita a limmaban daytoy.
Sigun kenkuana, maipasidong ti bangkay ti biktima iti mas komprehensibo nga eksaminasyon iti maysa a punerarya ditoy siudad ti Baguio.
Maipalagip nga itay agsapa ket sumrek kuman dagiti empleyado ti nasao a kooperatiba iti pasdek idi nakitada a nakalukat bassit ti ridaw ken sadiay a nasiripda ti dara-dara nga opisina ken ti nakadasay a biktima a rason tapnu dagusda met a nagreport iti pulisya.
Kabayatanna, agtultuloy ti imbestigasyon ti Baguio City Police Office (BCPO) – Station 7 iti nasao a pammapatay.
Sigun kenni P/Insp. Emerson Litilit, chief ti administration unit ti BCPO – Station 7, nabatad a panagtakaw ti motibo ti nasao a krimen.
Kinunana a daytoy ket gaputa adda dagiti mapukpukaw a banag iti nasao a kooperatiba a pakairamanan ti vault a naglaon iti P500,000 malaksid pay iti AVR ti computer ken camera.
Dinakamatna a mapapati a sinerrek dagiti agtatakaw ti maikadua ken maikatlo a kadsaaran ti nasao a kooperatiba.
Innayonna nga iti agdama ket dukduktalenda ti pakabigbigan dagiti suspek a nangaramid iti nasao a krimen.
