Nangrugin ti panagmonitor kadagiti pakaseknan dagiti manursuro iti parapubliko a pagadalan maipapan iti makabulan nga school break ken maipapan iti panagbakasionda.
Kasaruno ti panangiyuswat tiAlliance of Concerned Teachers (ACT) ti hotline idi laeng kalman, Mayo 5.
Babaen iti “Bantay Benepisyo at Karapatan” hotline, kasapulan a mabantayan dagiti manursuro iti panangiyemplementar ti Department of Education’s (DepEd) department order 003, s. 2024 nu sadinno, nakalanad a saan a rumbeng a maipaayan iti aniaman a trabaho wenno aktibidad dagiti manursuro bayat ti school break manipod Hunio 1 agingga 30 iti agdama a tawen.
Dagiti manursuro nga addaan ti reklamo ket mabalin a tumawag iti 09569130778 (Globe) ken 09684801168 (Smart); email actphilippines@gmail.com; wenno i-send iti fb.com/actph1982.
Kasapulan laeng nga iraman ti nagan, petsa, pagadalan, division, “person responsible” ken ikabil ti reklamo wenno isyu.
Inlawlawag ni ACT chairperson Vladimer Quetua a nalawag a ti Hunyo ket para bulan iti panaginana dagiti manursuro nga awan ti aniaman a panagpilit a panagtrabaho, panagserrek iti pagadalan ken aniaman a pannakipaset iti aniaman nga aktibidad iti uneg ti pagadalan.
Dinakamat pay ni Quetua a mabalin metlaeng nga ireport dagiti pakaseknan mainaig iti overtime wenno overload payt kasta met dagiti “service credits”.
Itay laeng nabiit, pinirmaan ni President Ferdinand ”Bongbong” Marcos Jr. ti Kabalikat sa Pagtuturo Act, nga addaan panggep a suportaran dagiti public school teachers babaen iti panangipangato ti allowance dagitoy.
