BAGUIO CITY – Posible a mabayagan pay ti maisaysayangkat a swine repopulation sadiay Benguet gapu iti panakaduktal manen ti presensia ti African Swine Fever (ASF) iti uppat a lugar iti tallo a munisipyo ti probinsia.
Iti panakiuman ti Bombo Radyo Baguio kenni Provincial Veterinarian Dr. Miriam Tiongan, inlawlawagna a saanen a mabalin a maipatungpal ti swine repopulation no adda pay ti presensia ti ASF wenno saan a siento porsiento a napunas to ASF virus iti maysa a naapektaran a lugar.
Kinunana a gapu iti daytoy ket manarimaan manen ti nainget a panangimplementarda iti biosecurity assessment, information drive, community assessment, animal disease surveillance kadagiti swine raisers ti Benguet tapnu marugianda metten ti swine repopulation sadiay.
Dinakamatna nga adda metten ti inisyal a listaanda iti nagan dagiti agtartaraken ti baboy sadiay Benguet a maipaayan ti pondo para iti nasao a swine repopulation tapnu dagus a mapaado ti suplay ti baboy iti probinsia.
Maipalagip a naduktalan ti panagpositibo iti ASF dagiti baboy sadiay Tublay, Tuba ken Itogon it a tawen.
