BAGUIO CITY – Maisayangkat ditoy siudad ti Baguio ti maysa voters’ education forum a naawagan ti “i-Change: Vote for a smoke-free Philippines” inton Biyernes, Abril 26.
Idauluan daytoy ti Philippine Legislators’ Committee on Population and Development ken dagiti dadduma a maseknan nga ahensia ti gobyerno.
Panggep ti forum a maipaayan dagiti botante iti impormasyon seknan iti dakes nga epekto ti panagsigarilyo ken maimpluwensia-an ti plataporma dagiti kandidato seknan iti nasao nga isyu.
Sigun iti grupo, agtultuloy ti panangipatungpalda iti serye ti forum tapnu maragpat ti 100 percent nga smoke-free environment ken ti panangidariragda iti panakaipangato ti buis dagiti tobacco products.
Puntiryada a maipangato ti panaka-ammo ti publiko seknan kadagiti nagduduma a polisiya nga adda pakainaiganna iti panakakontrol ti tabako wenno sigarilyo.
Maipalagip nga iti Baguio ket adda ti ordinansa a mangipawpawil iti panagsigarilyo kadagiti natatao a lugar.
