BAGUIO CITY – Mangisaysayangkat ti Benguet Provincial Veterinary Office iti imbentaryo kadagiti dingwen iti probinsia.
Sigun kenni Provincial Veterinarian Dr. Mirriam Tiongan, babaen iti daytoy ket nalaklaka a maduktalan dagiti kasapulan dagitoy kas iti bakuna.
Kinunana a maisaysayangkat ti imbentaryo iti panakikokoordinarda iti Philippine Statistics Authority ken iti public information office ti provincial government.
Dinakamatna nga agrikrikos ita kadagiti babbarangay dagiti personel ti opisina tapnu maala ti pakabuklan a bilang dagiti dingwen iti probinsya ti Benguet.
Nupay kasta, imbinsana a sumagmamano kadagiti agtartaraken ket agduadua a mangipapaay iti impormasyon wenno umno a bilang dagiti tarakenda gapu iti amak dagitoy a BIR iti mangisaysayangkat ti survey.
Gapu iti dayta, guyguyuguyenna dagiti addaan taraken a saan dagitoy nga agbuteng a mangipaay iti impormasyon agsipod ta profiling laeng ti panggep dagitoy tapnu amuda iti umno a bilang ti ipaayanda iti bakuna ken dadduma pay. (-with Bombo Brigitte Marcasi)
