BAGUIO CITY – Nabiag ti namnama dagiti mannalon iti probinsia ti Benguet iti panakairugi ti imbestigasion ti Senado seknan iti maatap a nasaknap a panakaipuspuslit dagiti nateng ditoy pagilian.
Iti interview ti Bombo Radyo Baguio, imbinglay ni Agot Balanoy, General Manager ti Benguet Farmers Cooperative nga idi paylaeng 2001 a parikutda ti agtultuloy a vegetable smuggling a mangpakpakaro iti panakalugi dagiti mannalon iti rehion ngem ita laeng a naipaayan iti atension.
Mangnamnama daytoy nga agbunga iti pagsayaatan dagiti mannalon ti manarimaan nga imbestigasion ti Senado.
Kinunana a kabayatan ti hearing ket saan a sinungbatan dagiti maseknan nga ahensia ti gobierno a pakairamanan ti DTI, BOC ken ti DA dagiti saludsod ken arungaing dagiti nagduduma nga stakeholders dagiti mannalon partikular iti panakaipuslit dagiti nateng nga itan ken nagwaras kadagiti merkado iti pagilian.
Dinakamatna nga awan ti umno a datus nga imparang dagiti ahensia ken nagkiddawda iti kanayonan a panawen tapno sungbatanda dagiti naiyuman a pakaseknan.
Gapu iti daytoy, posible a maipatungpal ti sabali manen a serye ti panagdenggeg.
Naduktalan pay nga awan ti uray maysa nga smuggler a naibalod manipud pay 2001 gaputta kadawyan nga agpipiyansa dagitoy kalpasan a mabaliwan ti kasoda iti falsification of documents no maipangaton iti korte ti kaso dagitoy.
Nainget a konkondenaren dagitoy dagiti mannalon gaputta agdadata a saan a patas ti panakadengngeg dagiti kaso ken saan a patas ti implementasion ti linteg ditoy pagilian.
Iti baet daytoy, kampante ni Balanoy a daytoyen ti panaglukat iti ruangan tapno maipangruna metten ti sektor ti agrikultura ken maipaayan aksion dagiti mannalon nangruna iti Benguet a kadakkelan a supplier ti nateng iti intero a pagilian.
Immmapela met daytoy kadagiti mannalon iti probinsia a makitinnulongda iti narugian nga aksion dagiti dadaulo dagitoy.
Naminsan met a nagkiddaw iti tulong ni Balanoy kadagiti opisyal iti lokalidad gaputta kangrunaan a dagiti pribado nga organisasion ti addan inisyatibo a duktalen dagiti nagduduma a pakaseknan dagiti mannalon.
