ABRA PROVINCE – Agtultuloy ti panaganup dagiti awtoridad iti suspek iti pammaltog iti traffic enforcer sadiay Sitio Kabildatan, Barangay Zone 7, Bangued, Abra idi rabii ti Enero 21.
Immunan a nabigbig ti biktima a ni Geraldine Ballesta Peralta, residente iti Bucay, Abra.
Iti exclusive interview ti Bombo Radyo kenni PCapt. Ronaldo Eslabra, Information Officer ti Abra Police Provincial Office, ti biktima ket traffic enforcer iti aldaw ken tricycle driver iti rabii kalpasan ti duty-na.
Sigun kenni PCapt. Eslabra, narekober ti innem a basyo ti calibre 45 ken maysa a live ammunition iti uneg ti imanmaneho-na a tricycle.
Bayat pay ti otopsiya ti biktima, narekober ti bala iti bagi daytoy.
Sigun kadagiti imbestigador, maatap a pasahero daytoy ti nangpalpaltog kenkuana.
Maibasar pay iti imbestigasyon, awan ti naibaga ni Geraldine a pangta iti biagna ngem inaklon ti misis daytoy a nainget ti panangipatungpalna kadagiti pagannurotan ti trapiko.
Iti agdama, hustisya ti ipukpukkaw ti misis ken gagayyem daytoy.
Manarimaan pay ti imbestigasyon dagiti operatiba maipapan iti motibo ti suspek iti nasao a krimen.
Malaksid iti dayta, manarimaan ti nainget a panagpatrolya dagiti operatiba tapno maliklikan ti kapada nga insidente sadiay Abra.//Marinel Rodrigo
