Kinumpirmar ni Interior and Local Government Secretary Jonvic Remulla a bangkay a nasarakanda ti negosyante a ni Anson Que ken ti drayber daytoy iti igid ti kalsada ti Rodriguez, Rizal idi Miyerkules.
Maibasar iti report, maysa a concerned citizen ti nakasarak kadagiti nasao bangkay.
Sigun kenni Police Regional Office 4A (PRO 4A) Public Information Office Chief Police Lieutenant Colonel Chitadel Gaoiran, nasarakan dagiti dua a bagi a nakakarga iti nylon bag, natalian iti nylon ken ti rupa dagitoy ket naka-duct tape.
Malaksid iti dayta, nakaaramat laeng iti underwear dagiti biktima ken dara-dara ti ulo dagitoy.
Maipalagip nga itay napalabas a bulan ket agkidkiddaw iti tulong ti pamilya ni Que iti Anti-Kidnapping Group (AKG) ti Philippine National Police kalpasan a nakidnap ti nasao a negosyante no sadino nagkiddaw dagitoy iti ransom.
Maibasar iti kanayunan a report, namintallo a daras a nagkiddaw iti ransom dagiti nangkidnap iti negosyante ken drayber daytoy a dumanon iti P100 million nupay kasta, pinapatayda ladta dagitoy.
Kabayatanna, kinuna dagiti otoridad a saan nga ordinaryo a kidnap for ransom ti napasamak no sadino ad-adalen dagitoy no adda kainaiganna iti Philippine Offshore Gaming Operator (POGO).
Maatap met a Pinoy ken Chinese nationals ti nangdukot kadakuada.
Iti agdama, manarimaan ti imbestigasyon ti Anti-Kidnapping Group iti nasao nga insidente bayat a kinondenar ti Movement for Restoration of Peace and Order (MRPO) ti pamapatay kenni Que ken ti drayber daytoy gapu ta brutal ti inaramidda.
Impasigurado met ti Malacañang a saan dagitoy a sumardeng agingga a maipaay ti hustisya.
