Impakaammo ni Justice Secretary Fredderick Vida iti press briefing idi kalman a naipaulogen ti Immigration Lookout Bulletin Order (ILBO) kontra kenni Senator Bato Dela Rosa.
Daytoy ket kalpasan a pimmanaw daytoy iti senate premises idi Mayo 14, manu laeng nga oras kalpasan iti napasamak a panapipinnaltog iti uneg ti senate building.
Kinumpirma metlaeng ni Vida ti warrant of arrest kontra kenni Senator Dela Rosa manipud International Criminal Court (ICC) ken naawaten daytoy iti pagilian a Pilipinas.
“I do confirm that there is a valid ICC arrest warrant and a pending request from ICC… it has been duly received by the Philippines,” sigun kenni Justice Sec Fredderick Vida.
Innayon pay daytoy nga agisumitir ti komento ti Office of the Solicitor General iti Korte Suprema kalpasan nga inbilin ti korte ti panagkomento ti sumagmamano nga opisyales iti kiddaw ni Senator Dela Rosa a restraining order ti pannangipaulog ti ICC arrest warrant.
Maipalagip a kinumpirmar ti International Criminal Court ti “secret” arrest warrant kontra kenni Senator Bato Dela Rosa idi Lunes, Mayo 11. //bombokaren.c.s
