BAGUIO CITY – Tututukan ita ti Public Order and Safety Division (POSD) ti kampanya kontra iti Bullying ken pannakaipatungpal ti Anti-Gang Ordinance ti Baguio City
Iti interview ti Bombo Radyo Baguio ken Marvin Herrera, dadaulo ti POSD, naan anay a naipasa ti nadakamat nga ordinansa iti lokal a konseho ken ur urayenda laeng ti Implemeting Rules and Regulation (IRR) daytoy
Sigun kenkuana, agtultuloy ti pannakibinnadangda iti Baguio City Police Office (BCPO) para iti pannakapasungbat dagiti responsable iti pannakadangran ti dua nga ubbing iti Burnham Park iti nagsina a kaso ti bullying.
Impettengna a saan a gapu ta menor de edad dagiti ubbing a karaman iti nasao a kaso ti bullying ket mailaksid dagitoy iti linteg wenno saanda a mapasungbat iti inaramid dagitoy a dakes.
Kinunana pay nga iwanwanawanda ita dagiti grupo ti agtutubo nga agkatangkatang iti syudad babaen iti nabukel nga Anti- Gang Task Force
Iti baet ti dayta, kinunana a masapolda ti tulong ti publiko ken nagannak a mangsitar kadagiti grupo dagiti agtutubo para iti pannakaigiya dagitoy iti napintas a dalan tapnu saanda nga agserbi kas riribok ti syudad
Inlawlawagna a nalaka laeng a maitudo dagiti gangs nga agkatang-katang iti syudad gapu iti wagas ti panagbadbado ken garaw dagitoy.
Kabayatanna, kinunana a kitkitaenda iti babaen iti pannakibinnadangda iti Traffic Division iti pannakaikkat dagiti impounded a lugan iti parking iti likudan ti City High School
Sigun ken Herrera, adda iti report a naawat dagitoy a ti nasao nga impouding area ket agserserbi kas tambayan dagiti grupo ti agtutubo wenno dagiti gangs
Dinakamatna nga iti nasao a disso ti pagu-urnungan dagiti nasao nga agtutubo nga ag-inom, agsigarilyo ken mapapati pay a panag aramatda kadagiti impounded a lugan kas hotels.
Nupay kasta, kinunana a dakasanggasat ket awan iti matyempoanda kadagitoy.
Gapu iti dayta, kinunana a tutukanda ita iti pannakadalus ti nasao a lugar ken mawanawanan nga usto tapnu saan nga isut agserbi kas tambayan dagiti agtutubo iti syudad para iti pannakaiyadayo dagitoy iti peggad.
