Agtultuloy a karit para iti Public Order and Safety Division (POSD) ti narigat a panangikkat kadagiti saanen a maus-usar ken nakabitin paylaeng a kable wenno dangling wires iti Baguio City, gapu iti bassit a bilang dagiti personnel ken kinaadu ti kiddaw para iti clearing operations kadagiti nagduduma a lugar iti siudad.
Sigun kenni Daryll Kim Longid, POSD Chief, nababa pay laeng nu 10% ti nagapuan ti clearing operation iti intero a siudad.
Inlawlawagna a gapu ta maysa laeng a grupo a bukbuklen laeng iti innem nga indibidual ti naituding a mangisayangkat iti nasao a trabaho kadagiti nagduduma a lugar iti siudad pakairamananen ti panangikkat kadagiti daan ken saanen a maus-usar a kable, ken ti pannakikadua kadagiti utility companies tapno maisimpa dagiti nababa a linya.
Nupay kasta, impeksa ni Longid a dandani 95% meten kadagiti dead wires iti maysa a barangay ti siudad ti Baguio ti naikkat dan. Iti agdama, nakapokus ti grupo iti panangurnos kadagiti live wires a nabati pay.
Inlawlawag metlaeng ti nasao nga opisyal a saan a dagus ti panangisayangkat ti operasyon iti intero a siudad, gapu ta masapul a maitunos ti iskedyul ti clearing team kadagiti kiddaw manipud kadagiti babbarangay ken dadduma pay a lugar a kasapulan ti nasao a trabaho.
Impeksana a maipangpangruna dagiti lugar a nangato ti risgo na kas maibasar iti risk assessment, nangruna kadagiti kalsada a mabalin a masagid dagiti kable kadagiti dadakkel a lugan.
Kabayatanna, maysa pay a pakaseknan ti POSD ti pannakaurnong dagiti naikkat a kable manipud kadagiti clearing operations. Sigun kenni Longid, naikabil dagitoy iti Block 4, Hilltop Street section iti Baguio City Public Market.
Gapu iti daytoy, kidkiddawenna kadagiti telecommunications companies, a dagusda koma nga alaen dagiti kukuada kadagiti naikkat a kable.
Impanamnama met ti opisyal a saan a sumardeng ti clearing operation iti siudad, ngem ti pannakaipatungpalna ket agdepende iti kabaelan ti manpower, kaadu dagiti kiddaw, ken kadagiti risgo a masarakan iti tunggal lugar iti siudad.// via Bombo Khey Reparip
