BAGUIO CITY – Ingetan pay ti Provincial Environment and Natural Resources Office (PENRO) – Benguet ti implementasyon ti Wildlife Resources Conservation and Protection Act tapnu malapdan ti panagkolektar kadagiti atap a mula ken panag-anop kadagiti atap nga ayop kadagiti kabakiran ti Benguet.
Iti panakiyuman ti Bombo Radyo kenni Emerita Albas, Wildlife Enforcement Officer ti PENRO-Benguet, kinunana a babaen daytoy iti panang-deputize-da kadagiti sumagmamano a barangay officials iti probinsia nga agtiliw kadagiti mangnganop a mangib-ibbos kadagiti atap nga ayop ken kadagiti mangal-ala kadagiti atap a mula.
Kinunana a kurang ti bilang dagiti bantay gubat ken forest rangers iti Benguet nga agbantay kadagiti kabambantayan.
Innayonna nga ado paylaeng dagiti atap nga ayop kadagiti kabambantayan ti Benguet kas baboy, ugsa ken python wenno beklat nga i-ibusen dagiti mangnganop.
Dinamat ni Albas nga adda iti nabigbig a wild deer sanctuary sadiay Bokod, Itogon ken Kabayan a bambantayan ti lokal a gobierno ken ti environmental department.
Inyunay-unayna pay a madusa ti asinoman a matiliwan nga agal-ala ken agkolkolektar kadagiti atap a mula ken agan-anop kadagiti atap nga ayop. -report from Bombo Jorton Campana
