BAGUIO CITY – Dakkel ti pakainaigan ti impluwesia ti arak iti panagngato ti kaso ti panagrames sadiay probinsia ti Benguet.
Inaklon daytoy ni Benguet Provincial Police Office Director PCol. Elmer Ragay iti panakiyuman ti Bombo Radyo kagiddan ti panangkunana a naibasar daytoy iti panagadal dagiti maseknan nga otoridad.
Gapu iti daytoy, kiniddawna kadagiti lokal a gobierno, partikular dagiti babbarangay ti panakitinnulongda kadagiti otoridad tapno ma-regulate ti panaginom ken panaglako ti arak kadagiti masakupanda a lugar.
Kinunana a kasapulan a maiwayat ti epektibo a panakiballaet babaen iti gobierno, saan laeng a para kadagiti biktima ti panagrames, ngem ketdi, uray pay kadagiti perpetrators wenno agar-aramid iti nasao a krimen.
Innayonna nga ikagkagumaan ita ti Benguet PPO a makikokoordinar kadagiti maseknan nga opisina ti gobierno tapno ad-adda a mapakaamuan dagiti umili kadagiti wagas tapno maliklikan ti panakapasamak ti panagrames nangruna iti mismo nga uneg ti maysa a pagtaengan.
Maibasar iti kaudian a datus ti Benguet Provincial Social Welfare Development Office, pakabuklan a 44 ti kaso ti panagrames a nailistada manipud Enero agingga Hulyo ti agdama a tawen.
Manipud iti nasao a bilang, 21 kadagitoy ti kaso ti incest rape wenno ti nagaramid iti krimen ket mismo a kapamilya wenno kabagian ti biktima.
Kadawyan met nga agar-aramid iti nasao a krimen ket dagiti ama, uliteg, lolo, kabsat ken kasinsin ti biktima.
