Inwaragwag ni Vice President ken Education Secretary Sara Duterte, a mabalin ti blended learning wenno distance learning kadagiti pagadalan iti baet ti umad-adu a heat index iti pagilian gapu iti El Niño.
Inyunay-unay ni Duterte nga awan ti problema iti panangsuspende dagiti local government units iti klase kadagiti amin a pagadalan.
Maibasar daytoy iti order ti Department of Education a mabalin a maisayangkat ti nasao wagas ti panagadal no adda dagiti maobserbar a parikot, pakairamanan ti kinabara ti panawen, bagyo ken panaglayos.
Nupay kasta, agtultuloy latta ti panagadal dagiti estudiante babaen iti panagusar kadagiti modules, no awan ti in-person classes.
Maipalagip, sumagmamano a local government units (LGUs) ti nangsuspende iti in-person classes kadagiti public ken private schools gapu iti kinabara ti panawen.
