Nakaala dagiti kameng ti Iglesia Ni Cristo iti permit para iti kilos protesta nga isayangkat dagitoy iti Mierkules, July 01, 2026.
Sigun iti Quezon City Department of Public Order and Safety (DPOS), awan ti panagkontrada iti pannakaipatungpal ti natalna a protesta iti White Plains Avenue.
Maipatungpal ti nasao a rally manipud 8:00 a.m agingga 8:00 p.m.
Sigun iti DPOS, adda dagiti sumagmamano a pagannurotan a nasken a masurot kas iti pannakaipatungpal laeng daytoy iti igid ti White Plains Ave iti Temple Drive, Quezon City.
Awan metlaeng ti mairikep a kalsada bayat ti nadakamat nga aktibidad ken makidkiddaw ti kinadalus ken urnos iti lugar.
Malaksid iti dayta, saan metlaeng a rumbeng a malapdan ti aniaman nga implementasion ti security measures dagiti polis ken lokal a gobierno.
Naiyunay-unay metlaeng a napateg a masurot dagiti linteg ti trapiko iti intero nga aktibidad.
Kabayatanna, manamnama a makipaset ditoy ti nasurok 100,000 nga indibidual manipud iti INC.
