BAGUIO CITY – Mapalpalagipan iti publiko a bantayanda a nalaing dagiti natatengan kadagiti pagtaengan dagitoy tapno saan a mapasamak ti kapada nga insidente wenno nakarkaro pay nga insidente.
Kasaruno daytoy ti naduktalan a dinosdosena a libro a naibelleng iti igid ti Burnham lake itay nabiit.
Maibasar iti imbestigasyon ti Tourist Police Unit, maysa a nataengan a lalaki ti nangibelleng kadagiti libro.
Iti interview ti Bombo Radyo kenni PMaj. Kurt Pacificar, dadaulo ti Tourist Police Unit, dagiti libro ket manipud kadagiti “Dibshi Jen Dibsho” ti Burnham Park wenno dagiti wooden cabinets a naglaon kadagiti donated a libro ken dadduma pay manipud iti Baguio City Public Library.
Nabigbig nga 81-anyos, makapaspasar iti mental instability ken residente ti Asin Road, Km5, Baguio City ti nangibelleng kadagiti libro iti nasao a pagpasyaran.
Nupay kasta, kidkiddawen ni PMaj. Pacificar ti pannakaawat iti publiko maipapan iti kasasaad ti senior citizen imbes a kondenaren daytoy.//Bombo Jez Lapizar
