TABUK CITY, KALINGA – Inyapela ti Tabuk City Social Welfare and Development Office iti Matagoan Bodong Consultative Council (MBCC) nga ilaksidda ti kaso ti panagrames manipud listaan dagiti kaso a maiyen-endorso para iti amicable settlement.
Iti naangay a City Peace and Order Council meeting itay nabiit, impetteng ni CSWDO Officer III Vilma Palma a nu maidalan iti settlement ti insidente ti panagrames ken nu saan a mapilaan iti kaskenan a kaso ti suspek ket adda ti tsansa nga ulitenna manen ti inaramidna a krimen.
Nailawlawag iti pablaak ti Tabuk City Public Information Office a ti Bodong ket maysa a katulagan para iti panagkaykaysa ken kappia nga ar-aramaten dagiti umili ti Kalinga tapno marisut ti saan a panagkikinnaawatan malaksid laeng iti nadadagsen a krimen kas koma iti panagrames.
Sigun met kenni MBCC Chairman Engr. Andres Ngao-i, saan a rumbeng a maidalan iti amicable settlement dagiti kaso ti panagrames ngem adda dagiti gundaway a mismo a dagiti biktima ti manginkayat rason nga awan ti maaramidanda nu di ket irespetoda ti desisyon dagiti biktima.
Impeksa ni Ngao-i a dadduma kadagiti biktima ket pilienda nga idalan iti settlement gapu ta awan ti pigsada a dumalan iti nailet a proseso iti korte malaksid pay iti pinansiyal ken teknikalidad iti court proceedings.
Iti baet daytoy, agpada a pinaburan ti City Social Welfare and Development Office ken ti Matagoan Bodong Consultative Council a saan a rumbeng a maidalan iti settlement ti kaso ti panagrames.
Kabayatanna, kiniddaw met ni Tabuk City Mayor Darwin Estrañero iti Matagoan Bodong Consultative Council a sakbay koma nga agdesisyon ti pamilya nga idalan iti settlement ket ikonsultada dagiti kameng ti CSWDO.
Maibasar iti datus ti CSWDO, adda ti 21 a kaso ti panagrames a nairekordda idi napan a tawen idiay Tabuk City, Kalinga.
