Nangiruwaren ti baro a pagalagadan ti International Criminal Court (ICC) Registry para iti naituding a panagdengngeg ti kaso ni sigud a President Rodrigo Duterte a sumangsango ita iti kaso a crimes against humanity seknan iti kampanya daytoy kontra iti druga.
Karaman kadagiti inrekomenda ti ICC Registry ket ti panangbigbig dagiti partido kadagiti paset ti transcript a kayatna nga ipa-redact wenno saan nga ipablaak.
Insingasing metlaeng ti nasao nga opisina ti panagaramat iti transcript verification process a naaramat iti kaso ni Mahamat Said Abdel Kani tapno masigurado ti accuracy dagiti official record iti nasao a panagdengengeg.
Malaksid iti dayta, ginuyugoy met ti Registry ken Trial Chamber III dagiti makipaset iti kaso nga aramatenda ti witness-entity ken e-binder modules para iti Judicial Workflow Platform.
Sigun iti registry, makatulong daytoy tapno mapagtalinaed nga organisado ken komprehensibo amin a rekord iti nasao a kaso.
Maipalagip nga iti umuna nga status conference idi Mayo 27, inbilin ni Trial Chamber III Presiding Judge Joanna Korner ti dagos a pannakataming ni sigud a President Duterte tapno maamuwan nu kabaelanna a sumango iti hearing wenno saan.
Naituding met ti panangrugi ti panagdengngeg iti kasona inton Nobyembre 30 iti agdama a tawen.
Sakbay dayta, maaddaan ti korte iti dua pay nga status conference inton Hunyo 23 ken Hulyo 14 kas paset iti panagsagana para iti umadani a panagdengngeg. //bombokaren.c.sapirao
