BAGUIO CITY – Linawlawagan ni Department of Agriculture – Cordillera Regional Director Cameron Odsey nga awan ti mapaspasaran nga overproduction ti pipino sadiay probinsia ti Benguet.
Iti panakiyuman ti Bombo Radyo, kinunana nga awan kinapudno ti nailanad iti maysa a nag-viral a post iti social media a maibagbaga nga overproduction ti rason ti panangibelleng ti maysa a mannalon kadagiti pipino sadiay Longlong, Puguis, La Trinidad, Benguet.
Naduktalan iti imbestigasyon dagiti personnel ti DA-Cordillera a dagiti nasao a prutas ket naikabil wenno naibelleng iti lote ni Mrs. Grace Fagyan iti paset ti communal forest saiday Longlong, Puguis, La Trinidad.
Naamuan a ni Mrs. Fagyan ket vegetable vendor iti La Trinidad Vegetabl Trading Post ken aramidnan ti agkolektar kadagiti reject a natnateng ken prutas manipud iti trading post ken iyawidna dagitoy para iti composting purposes wenno kas taraon dagiti dingwenna.
Kinuna ni Director Odsey nga inyawid ni Mrs. Fagyan ti 47 a sako ti reject a pipino manipud iti trading post ken imbelleng wenno inwarasna daytoy ioti asideg ti balayna para iti natural composting.
Dinakamatna a daytoy ti nakita ti maysa a passerby a nangala iti ladawan ken nangipablaak iti social media.
Inlawlawag pay ti dadaulo ti DA-Cordillera a dagiti naibelleng a pipino ket addaan nababa a kalidad, saan a nailako iti uneg ti sumagmamano nga aldaw agingga a naklasipikar a reject.
Maibasar iti resulta ti imbestigasyon ti ahensia iti nasao nga isyu, ita a rainy season ket addan dagiti pipino iti maikanem ken maikapito a panagapit ken nangrugin ti panagbaba ti kalidad dagitoy.
Nailanad pay nga iti umuna agingga maikalima a panagapit ti mannalon ti pipino ket nasubbotnan ti gastosna iti panagmulana iti nasao a prutas gaputa nangina ti pipino kabayatan ti dry months.
Maibasar pay iti datus ti DA-Cordillera, ngimmato ti produksion ti pipino iti 25% manipud iti 647 metric tons idi June 2018 ket nagbalin nga 805 metric tons iti a June 2019.
Nupay kasta, kinuna ni Odsey a mangipatpatungpal ti ahensia kadagiti konsultasyon ken validation tapno maaksiyonan ken maliklikan ti panakasayang dagiti nateng a maibelbelleng.
Ituloy pay ti DA-Cordillera a mangisakad iti crop programming, value-adding, proper composting methods, multi-cropping, contract growing ken market linkaging.
