Kaadoan kadagiti Pilipino ket saan nga agtalek iti China kas maibasar iti kaudian a resulta ti OCTA Research survey.
Maibasar iti March 2024 First Quarter “Tugon ng Masa” survey, 91 percent kadagiti adult Filipino ti nangipeksa a saanda nga agtalek iti China bayat nga 8% laeng ti nangibaga nga adda ti panagtalekda iti nasao a pagilian.
Sipud pay idi Pebrero 2022 ket kinuna ti OCTA research nga agtaltalinaed a nababa ti bilang dagiti Pilipino nga agtalek iti China bayat a ngumatngato met ti bilang dagiti Pilipino a saan nga agtalek iti nasao a pagilian.
Kabayatanna, agtaltalinaed met a nangato ti trust rating wenno panagtalek dagiti adult Filipino iti Estados Unidos nga addaan ti nasurok 85% sipud Hulyo 2021.
Agarup 1,200 a respondents iti pagilian ti naibasaran ti nasao a survey.
