Pimmusay ti kaanakan ni Shariff Aguak Mayor Akmad Mitra Ampatuan bayat a nadangran ti kabsatna kalpasan a na-ambush dagitoy sadiay Datu Saudi Ampatuan, Maguindanao del Sur idi Martes, February 17, 2026.
Nabigbig ti pimmusay a ni Datu Gara Ampatuan, kaanakan ti nasao a Mayor.
Dagus met a naitaray iti ospital para iti dagus a pannakataming ti ub-ubing a kabsat ti mayor a ni Datu Mama Ampatuan.
Maibasar iti inisial a report, nagtaud dagiti biktima manipud Cotabato City ken nakaluganda iti nangisit a Nissan Livina.
Paturong dagitoy sadiay Shariff Aguak idi pinalpaltogan dagiti saan pay a nabigbig a suspek iti National highway ti Datu Saudi Ampatuan.
Iti agdama, agtultuloy ti imbestigasion ti Philippine National Police (PNP) tapno maammuan ti kinasiasino dagiti suspek ken no ania ti motibo dagitoy.
Maipalagip nga immuna a na-ambush metlaeng ni Shariff Aguak Mayor Akmad Mitra Ampatuan idi Enero 25, 2026.
Nakalasat ti Mayor bayat a nadangran dagiti dua a security escort daytoy iti uneg ti lugan.
Iti nadakamat nga insidente, nagaramat dagiti suspek iti RPG ken high-powered firearms.
Nupay kasta, nasarakan metlaeng ti bangkay dagiti tallo a mapapati a suspek iti uneg mismo ti lugan nga inaramat dagitoy iti krimen.
