BAGUIO CITY – Impannakkel ti Department of Social Welfare and Development (DSWD) iti rehiyon nga awan kadagiti politiko ken kandidato iti Cordillera ti mangar-aramat iti Pantawid Pamilyang Pilipino Program (4Ps) tapnu mapabanglo ti nagan dagitoy para iti masungad nga eleksion.
Iti panakiyuman ti Bombo Radyo kenni DSWD-Cordillera regional director Janet Armas, kinunana a ‘welcome’ iti opisinada ti panggep ti senado a panangimbestigar iti 4Ps, partikular ti maatap a panang-aramat ditoy dagiti politiko.
Nupay kasta, inwaragawagna a nagasat ti Cordillera gaputa dagiti politiko ditoy ket iresrespetoda dagiti pagalagadan ti programa, partikular ti saan a panaka-aramat daytoy iti aniaman nga isyu iti politika.
Innayonna a sakbay a naimplementar ti 4Ps ken tunggal adda dagiti baro a mabotosan nga opisyales ket ipalawagda kadagitoy dagiti patakaran ti programa.
Sigun pay kenkuana, ammon dagiti umili iti rehiyon a no adda man ti kanayonan a benipisaryo ti 4Ps ket dumalan dagitoy iti proseso ti DSWD ken saan nga iti asinoman a personalidad.
Dinakamatna a maysa a paglinteganda ket saan a mapalubusan ti idadar-ay dagiti politiko ken uray pay dagiti agdama nga opisyales kadagiti aktibidad dagiti 4Ps, pakairamanan ti pay-out dagitoy.
Inwaragawag pay ni director Armas a manarimaan ti text brigade kadagiti staff ti ahensia para iti panagwanawanda iti rehiyon seknan iti panaka-aramat ti 4Ps iti politika.
Nupay kasta, kinunana nga awan met ti nangngegan wenno namonitorda a kampanya dagiti politiko nga espisipiko a nangdakamat iti 4Ps.
Innayonna a ti laeng kampanya dagiti politiko ket ti panangipeksa dagitoy iti panangsuportarda iti nagduduma a programa ken serbisyo nga ipapaay ti DSWD ken ti panangtulong dagitoy kadagiti kakailyanda.
Nupay kasta, inyapela latta ni Armas ti saan a panangaramat dagiti politiko iti 4Ps para iti panakapabanglo ti nagan dagitoy, nangruna dagiti agpampanggep a mangaramat iti nasao a program ti gobyerno para kadagiti nakukurapay a Pilipino.
