Agarup siyam a gasut a serbisyo wenno negosyo ti naapektaran idiay Estados Unidos gapu iti napasamak a kadakellan nga Information Technology (IT) outage iti pakasaritaan ti sangalubongan.
Naapektaran dagiti airlines, bangko, pagadalan, govenment services kasta met dagiti emergency services nu sadino daduma ket naka-offline wenno nagmanual ti proseso dagitoy.
Mapatta-patta a ti rason ti nasao nga outage ket gapu iti software update para iti Microsoft Windows operating systems nga in-isyu ti cybersecurity firm a CrowdStrike.
Nu pay kasta, kinuna ti Chief Executive Officer ti CrowdStrike a naipatungpalen ti panakarisut ti nasao a problema ngem, manamnama a saan a dagus a maisubli dagiti operasyon dagiti naapektaran a kompanya ken ahensya ti gobyerno.
