BAGUIO CITY – Kinumpirmar ni Capt. Captain Cheryl Tindog, Public Information Officer ti Philippine Military Academy ti ipupusay ti maysa a kadete sadiay kalpasan a nalmes iti swimming pool iti uneg ti akademia itay malem.
Iti panakiyuman ti Bombo Radyo, binigbigna daytoy a ni Cadet 4th Class Mario Telan Jr. ti Alpha Company iti Cadet Corps ti Armed Forces of the Philippines, 20-anyos, tubo ken residente ti Divisoria, Enrile, Cagayan.
Kinunana a simrek pay ni Telan iti swimming class dagitoy iti oras ti alas-onse agingga alas-dose ti pangaldaw ngem kalpasanna ket saanen daytoy a nakita pay.
Innayonna a saan metlaeng a simrek ni Telan iti simmaruno a klasena isut gapuna a binirok dagiti kadete ken dagiti opisyal ti akademia ti kadete agingga a nasarakan laengen daytoy iti swimming pool ti PMA.
Dagos nga inalada ti kadete ken pinadasda nga irevive ken itaray iti PMA Station Hospital ngem naideklara a dead on arrival ni Telan babaen iti attending physician.
Kabayatanna, impeksa ti akademya ti panakipagladingitda iti pamilya ni Telan.
Manarimaan ti imbestigasyon nga isaysayangkat dagiti otoridad mainaig iti nadakamat nga insidente.
