BAGUIO CITY – Inladawan ni COMELEC – Cordillera Regional Election Director Ma. Juana Valeza a naballigi ken ‘generally peaceful’ wenno nakappia ti kaleppas a midterm elections iti entero a rehiyon Cordillera.
Sigun kenkuana, awan dagiti nagbalin a dadakkel a parikut malaksid laeng iti sumagmamano a parikut kadagiti vote counting machines (VCMs) ken SD cards ken iti naipadamag a panagdinnanog sadiay Abra.
Kinunana a dagus met a narisut wenno naaksionan dagiti parikut kadagiti VCMs ken SD cards kagiddan ti panangaklonna a ti parikut kadagitoy ti nangitantan iti panakaisayangkat ti eleksion.
Innayon ni Valeza a nasayaat ti koordinasyon ti COMELEC iti militar ken pulisya, pakairamanan dagiti mannursuro iti panakaisayangkat ti napalabas a basingkawel.
Impannakkelna pay a ngimmato ti voter turnout iti rehion gapu iti napasayaat a kasasaad ti linak ken kappia iti nagduduma a paset ti Cordillera, partikular sadiay Kalinga ken iti Abra.
