Impeksa ti Philippine Air Force (PAF) ti panakipagladingitda iti pamilia ken ay-ayaten ti Southeast Asian Games gold medalist ken airman a ni Mervin Guarte.
Iti maysa a statement, kinuna ti Philippine Air Force (PAF) a nakaro ti panagladingitda iti ipupusay ni Guarte, maysa nga Airman First Class (A1C), a dinakamat ti institusion kas maysa a nalaing a soldier athlete a nakikadua iti Philippine Air Force (PAF) babaen ti direct enlistment idi 2015 ken naidestino idiay Lipa, Batangas.
Impasigurado met ti nasao nga ahensia ti naan-anay a suporta ken tulong iti pamilia ti pimmusay a ni Guarte.
Idi laeng kalman ti agsapa, pimmusay ni Guarte gapu iti panagbagbagsolda kenkuana idiay Calapan City, Oriental Mindoro.
Sigun iti Philippine Air Force (PAF), makitinnulongda iti Calapan City Police iti agtultuloy nga imbestigasionda iti nasao nga insidente.
Iti imbestigasion ti Oriental Mindoro Provincial Police Office, matmaturog ti agtawen ti tallo pulo ket dua nga atleta iti pagtaengan ti maysa nga opisial a barangay idi napasamak ti insidente.
Nabaelan pay nga immawag ti tulong ni Guarte ken naiturong iti pag-agasan ngem pimmusay metlaeng daytoy.
