BANGUED, ABRA – Impeksa ni Atty. Reyman Solbita, Election Officer ti Bangued, Abra a nakasagana nga agserbi kas electoral board dagiti kameng ti pulisya iti kanito nga agbabawi dagitoy mannursuro iti umadanin a 2025 midterm elections.
Iti interview ti Bombo Radyo, kinuna ni Solbita a manarimaan ti panagsanay dagiti mannursuro nga agserbi kas electoral board idiay Bangued, Abra iti kaaldawan ti eleksyon.
Maipasidong metlaeng iti training dagiti kameng ti pulisya tapno adda ti nakasagana a mangsukat kadagiti agback-out a mannursuro.
Maisuro kadagiti agbalin nga electoral board ti umno a wagas iti panang-aramat ken panang-operate iti Automated Counting Machines.
Kabayatanna, impeksa ni Atty. Solbita a mangnamnama daytoy a saan a mairaman ti Abra iti red category iti umadanin nga eleksyon gapu ta nu mapasamak daytoy ket mabalin a mangipakita a saan a kabaelan ti pulisya ken COMELEC a mangpatalinaed iti linak ken kappia.
