BAGUIO CITY – Kadagiti kallabes a tawen, nagsasaruno nga uram ti napaspasamak kadagiti kabanbantayan ken kabakiran iti probinsiya ti Benguet ken dadduma pay a lug-lugar.
Malaksid laeng daytoy kadagiti panakauram dagiti nagduduma nga istraktura a nakapukawan ti biyag ken napapateg a sanikua.
Iti panagsangbay ti bulan ti Marso, maobserbaran manen ti fire prevention month.
Nupay kasta, awan serbi ti nasao a selebrasyon no kurang met dagiti addang a maipatpatungpal tapno maliklikan ti uram.
Gapu iti daytoy, rumbeng nga agtultuloy ti kampanya nga ipatungpal dagiti maseknan nga opisina kontra iti uram a pakairamanan ti forest fires, saan laeng nga iti tunggal bulan ti Marso.
Napateg ti aksiyon ti tunggal maysa iti daytoy a pakaseknan agsipud ta sansanguen ti sangalubungan ti parikut iti climate change ken global warming.
Gapu iti daytoy, rumbeng nga agtitinnulong ti tunggal indibidual a mangipateg ken mangsaluad iti nakaparsuaan babaen iti pananglapped kadagiti forest fires.
Babaen iti daytoy, sigurado a marikna tayo met ti panangisakit kadatayo ti nakaparsuaan.
