BAGUIO CITY – Agtultuloy ti kampanya ti Land Transportation Office (LTO) – Cordillera kontra kadagiti colorum a lugan nangruna ita nga panawen ti pandemya a limitado paylaeng ti parapubliko a transportasyon.
Sigun kenni LTO-Cordillera Regional Director Francis Ray Almora, adu latta dagiti colorum a lugan nga matiltiliw ken iwan-wanawanda iti rehiyon.
Kinunana nga adu dagiti matiltiliwan nga van ken SUVs a mangi-bibiahe kadagiti umili ita nga limitado pay dagiti agbibiahe a lugan wenno dagiti bus.
Malaksid iti dayta, parikot pay ita ti ahensia ita ti impounding area kadagiti matiltiliw a colorum a lugan ngem nangrugidan nga agsapol iti alternatibo a pasdek.
Kabayatanna, inaklon ni Almora nga kurang pay ita ti bilang dagiti bus ken van a tumartary iti nagduduma nga ruta iti rehiyon isunga adu dagiti lugar a saan a maserserbian iti transportasyon.
Nainget met a tuttukanda daytoy tapnu maliklikan nga agbiahe dagiti awanan iti kaskenan nga permiso wenno dokumento para iti natalged a panagbiahe.
Kagiddan iti dayta, nakasaganan ti LTO-Cordillera para iti pannakaipatungpal ti Oplan Ligtas Biahe para iti Semana Santa.
Kidkiddawenda met ti pannakitinulong ti dadduma nga ahensia tapnu maipatalged dagiti paglintegan ti trapiko ken kalsada kabayatan ti obserbasyon ti Semana Santa ita nga bulan.
